ໃນວັນທີ 10 ກໍລະກົດ 2025, ຄະນະກໍາມະການສົ່ງເສີມ ແລະ ຄຸ້ມຄອງການລົງທຶນ, ຮ່ວມກັບ ສູນອາຊຽນ-ຍີ່ປຸ່ນ (ASEAN Japan Centre), ຫ້ອງການສົ່ງເສີມການຄ້າຍີ່ປຸ່ນ ປະຈໍາ ນະຄອນຫຼວງວຽງຈັນ (JETRO Vientiane Office) ແລະ ຂະແໜງການກ່ຽວຂ້ອງ ລາວ-ຍີ່ປຸ່ນ ໄດ້ຈັດກອງປະຊຸມສົ່ງເສີມການລົງທຶນລາວ ທີ່ໂຮງແຮມ the Royal Park Iconic, ນະຄອນໂອຊາກາ, ປະເທດຍີ່ປຸ່ນ ໂດຍການເປັນກຽດເຂົ້າຮ່ວມ ຂອງ ທ່ານ ຄໍາເຈນ ວົງໂພສີ, ລັດຖະມົນຕີ ປະຈໍາຫ້ອງວ່າການສໍານັກງານນາຍົກລັດຖະມົນຕີ ແລະ ບັນດາທ່ານຮອງລັດຖະມົນຕີ ຂອງຂະແໜງການກ່ຽວຂ້ອງ ຂອງ ສປປ ລາວ ເຂົ້າຮ່ວມ ລວມທັງໝົດປະມານ 120 ທ່ານ, ໃນນັ້ນຝ່າຍລາວ 30 ທ່ານ ແລະ ພາກທຸລະກິດຍີ່ປຸ່ນ 90 ທ່ານ.
ກອງປະຊຸມດັ່ງກ່າວແມ່ນກອງປະຊຸມປະຈໍາປີ ໂດຍຄັ້ງນີ້ໄດ້ຈັດຂຶ້ນໃນໂອກາດການເດີນທາງເຂົ້າຮ່ວມງານວັນລາວໃນງານວາງສະແດງໂລກ ໂອາຊາກາ 2025 ແລະ ສະເຫຼີມສະຫຼອງສາຍພົວພັນການທູດ ລະຫວ່າງ ລາວ ແລະ ຍີ່ປຸ່ນຄົບຮອບ 70 ປີ ຊຶ່ງມີຈຸດປະສົງເພື່ອເຜີຍແຜ່ທ່າແຮງ ແລະ ກາລະໂອກາດການລົງທຶນໃນ ສປປ ລາວ ລວມທັງ ນະໂຍບາຍການລົງທຶນໃນເຂດເສດຖະກິດພິເສດ ແລະ ນິຄົມອຸດສາຫະກໍາ, ພ້ອມທັງເປັນໂອກາດໃນການຮັດແໜ້ນສາຍພົວພັນທາງດ້ານການຄ້າ, ການລົງທຶນ ແລະ ເປັນການເປີດໂອກາດໃຫ້ນັກທຸລະກິດຂອງສອງປະເທດໄດ້ມີໂອກາດພົບປະແລກປ່ຽນກັນໃນຂະແໜງກະສິກໍາ, ອຸດສາຫະກໍາປຸງແຕ່ງ, ການບໍລິການ, ການຂົນສົ່ງ, ທ່ອງທ່ຽວ ແລະ ອື່ນໆ.
ກອງປະຊຸມສົ່ງເສີມການລົງທຶນ ຄັ້ງນີ້ຈັດຂຶ້ນໃນໄລຍະທີ່ເໝາະສົມ ທັງນີ້ເພື່ອເປັນການເຜີຍແຜ່ກ່ຽວກັບ ການປັບປຸງກົງຈັກ-ການຈັດຕັ້ງທີ່ຮັບຜິດຊອບວຽກງານສົ່ງເສີມ ແລະ ຄຸ້ມຄອງການລົງທຶນ ແລະ ບັນດານິຕິກຳທີ່ກ່ຽວຂ້ອງເປັນຕົ້ນແມ່ນການປັບປຸງນະໂຍບາຍສົ່ງເສີມການລົງທຶນ. ໃນນັ້ນ, ສິ່ງທີພົ້ນເດັ່ນແມ່ນໄດ້ປັບປຸງກົດໝາຍສົ່ງເສີມການລົງທຶນໃນປີ 2024, ການຈັດຕັ້ງປະຕິບັດນະໂຍບາຍໃໝ່ໃຫ້ແກ່ເຂດເສດຖະກິດພິເສດ ແລະ ດໍາລັດວ່າດ້ວຍນິຄົມອຸດສາຫະກຳ ເພື່ອກຳນົດນະໂຍບາຍທີ່ເຈາະຈົງ ແລະ ພິເສດຕື່ມ. ພ້ອມນີ້, ນັກລົງຍີ່ປຸ່ນຍັງໄດ້ແລກປ່ຽນກ່ຽວກັບສະພາບ, ກາລະໂອກາດ, ຜົນສໍາເລັດ ແລະ ສິ່ງທ້າທາຍໃນການລົງທຶນຕົວຈິງຢູ່ ສປປ ລາວ ໃນຂະແໜງກະສິກໍາ, ຕ່ອງໂສ້ອຸດສາຫະກໍາການຜະລິດ, ການບໍລິການ, ການຂົນສົ່ງ, ແລະ ການບໍລິການຕິດພັນການທ່ອງທ່ຽວເຊັ່ນໂຮງແຮມ ແລະ ຮ້ານອາຫານ.
ໃນຕອນທ້າຍນີ້ ທ່ານ ຄໍາເຈນ ວົງໂພສີ, ລັດຖະມົນຕີ ປະຈໍາຫ້ອງວ່າການສໍານັກງານນາຍົກລັດຖະມົນຕີ ໄດ້ເຊື້ອເຊີນບັນດາບໍລິສັດຍີ່ປຸ່ນ ໄປຢ້ຽມຢາມລາວ, ຊອກກາລະໂອກາດການລົງທຶນຕົວຈິງ ໃນບັນດາຂະແໜງການທີ່ຍົກຂຶ້ນໃນກອງປະຊຸມ ແລະ ລົງມືລົງທຶນ ຢູ່ໃນປະເທດລາວ. ລັດຖະບານ ກໍ່ຄືພາກທຸລະກິດລາວ ມີຄວາມມຸ່ງຫມັ້ນທີ່ຈະຮ່ວມມືກັບນັກລົງທຶນຍີ່ປຸ່ນ ແລະ ຮັບປະກັນຜົນປະໂຫຍດທັງສອງຝ່າຍ.