ໃນວັນທີ 31 ຕຸລາ 2025, ທີ່ຫ້ອງການຄະນະກໍາມະການສົ່ງເສີມ ແລະ ຄຸ້ມຄອງການລົງທຶນ, ທ່ານ ບຸນເຖິງ ດວງສະຫວັນ, ຮອງລັດຖະມົນຕີ, ຮອງປະທານຄະນະກໍາມະການສົ່ງເສີມ ແລະ ຄຸ້ມຄອງການລົງທຶນ, ຜູ້ປະຈໍາການ ໄດ້ຕ້ອນຮັບບັນດາ ທ່ານເອກອັກຄະລັດຖະທູດ ເເລະ ກົງສຸນໃຫຍ່ ຂອງ ສປປ ລາວ ທີ່ກະກຽມໄປປະຕິບັດໜ້າທີ່ ຢູ່ ສສ ຫວຽດນາມ, ໄທ, ສ ເກົາຫຼີ ແລະ ເຢຍລະມັນ.
ໃນໂອກາດນີ້, ທ່ານ ຮອງລັດຖະມົນຕີ, ຮອງປະທານ ຄລທ, ຜູ້ປະຈໍາການ ໄດ້ນໍາສະເໜີທ່າແຮງສະພາບການລົງທຶນໃນລາວ, ລວມທັງສະພາບການລົງທຶນ ຂອງບັນດາປະເທດ ເຊັ່ນ: ສສ ຫວຽດນາມ, ໄທ, ສ. ເກົາຫຼີ ແລະ ເຢຍລະມັນ ໃຫ້ບັນດາທ່ານເອກອັກຄະລັດຖະທູດ ເເລະ ກົງສຸນໃຫຍ່ ຂອງ ສປປ ລາວ ທີ່ກະກຽມໄປປະຕິບັດໜ້າທີ່ ຢູ່ ຕ່າງປະເທດຮັບຊາບ. ພ້ອມທັງໄດ້ມີການແລກປ່ຽນປຶກສາຫາລືແນວທາງໃນການຮ່ວມມືໃນການທີດຶງດູດການລົງທຶນ, ການສະໜອງຂໍ້ມູນ ແລະ ສືບຕໍ່ປະສານງານໃນຕໍ່ໜ້າ. ທັງນີ້ເພື່ອໃຫ້ ສປປ ລາວ ສາມາດເພີ່ມທະວີການ ດຶງດູດການລົງທຶນຈາກ ບັນດາປະເທດດັ່ງກ່າວ ໄດ້ຢ່າງກວ້າງຂວາງ ແລະ ມີປະສິດທິພາບຫຼາຍຂຶ້ນ.
ສຳລັບວຽກງານດຶງດູດການລົງທຶນໄລຍະຜ່ານມາ ໄດ້ຮ່ວມກັບ ສະຖານທູດລາວ ປະຈໍາປະເທດ ຍີ່ປຸ່ນ, ສູນອາຊຽນ-ຍີ່ປຸ່ນ, ສະຖານທູດລາວ ປະຈໍາ ສ.ເກົາຫຼີ, ກອງເລຂາ ງານວາງສະແດງຈີນ-ອາຊຽນ ຮ່ວມກັນຈັດກອງປະຊຸມດືງດູດການລົງທຶນ ເປັນປະຈໍາປີ ແລະ ໃນກາງເດືອນ ພະຈິກ 2025 ມີແຜນຮ່ວມກັບສະຖານທູດລາວ ປະຈໍາ ສສ ຫວຽດນາມ ຮ່ວມກັນຈັດກອງປະຊຸມສົ່ງເສີມການຄ້າ, ການລົງທຶນ ລາວ-ຫວຽດນາມ ໂດຍຈະໄດ້ເຊື້ອເຊີນເອົາບັນດາຜູ້ລົງທຶນຕາມຂະແໜງເປົ້າໝາຍເຂົ້າຮ່ວມ.
ໃນປະຈຸບັນ ໄດ້ມີພະນັກງານຈາກ ຄລທ ໄປປະຈໍາການຢູ່ 7 ປະເທດຄື: ສປ ຈີນ, ສສ ຫວຽດນາມ, ໄທ, ສ.ເກົາຫຼີ, ຣັດເຊຍ, ຝຣັ່ງ ແລະ ຍີ່ປຸ່ນ ເພື່ອເຮັດໜ້າທີ່ໃຫ້ຄໍາປຶກສາ ແລະ ໂຄສະນາດຶງດູດການລົງທຶນ ເຂົ້າມາ ສປປ ລາວ, ພ້ອມທັງຕິດຕາມ ລາຍງານສະພາບ ການພັດທະນາເສດຖະກິດ-ສັງຄົມ ຂອງບັນດາປະເທດເຈົ້າພາບ ໃຫ້ ຄະນະກຳມະການສົ່ງເສີມ ແລະ ຄຸ້ມຄອງການລົງທຶນ ຮັບຊາບ ແລະ ຕິດຕາມ.