ກອງປະຊຸມພົບປະທຸລະກິດ ລາວ-ຈີນ ໄດ້ຈັດຂຶ້ນໃນວັນທີ 9 ພະຈິກ 2024 ທີ່ນະຄອນຫາງໂຈ, ແຂວງເຈີຈຽງ, ສປ ຈີນ ໂດຍມີຄະນະນໍາຈາກພາກລັດ ແລະ ພາກທຸລະກິດ ຂອງ ສປປ ລາວ ແລະ ແຂວງເຈີຈຽງ, ສປ ຈີນ ເຂົ້າຮ່ວມ ລວມຈຳນວນທັງໝົດ 150 ກວ່າທ່ານ ໂດຍພະນະທ່ານ ສອນໄຊ ສີພັນດອນ, ນາຍົກລັດຖະມົນຕີ ແຫ່ງ ສປປ ລາວ ໄດ້ໃຫ້ກຽດເຂົ້າຮ່ວມກ່າວສູນທອນພົດ ໃນກອງປະຊຸມດັ່ງກ່າວ.
ກອງປະຊຸມພົບປະທຸລະກິດ ລາວ-ຈີນ ຄັ້ງນີ້ ຮ່ວມຈັດໂດຍສະພາການຄ້າ ແລະ ອຸດສາຫະກໍາ ແຫ່ງຊາດລາວ ແລະ ສະພາສົ່ງເສີມການຄ້າສາກົນ ແຂວງເຈີຈຽງ ພາຍໃຕ້ການປະສານສົມທົບກັບກະຊວງ ແຜນການ ແລະ ການລົງທຶນ, ກະຊວງ ອຸດສາຫະກຳ ແລະ ການຄ້າ ແລະ ກະຊວງ ການຕ່າງປະເທດ ຂອງ ລາວ. ກອງປະຊຸມດັ່ງກ່າວເປັນເວທີໜື່ງທີ່ມີຄວາມສຳຄັນໃນການ ເສີມຂະຫຍາຍສາຍພົວພັນການຮ່ວມມືທາງດ້ານເສດຖະກິດ-ສັງຄົມ ຂອງ ສອງປະເທດ ລາວ-ຈີນ, ໂດຍສະເພາະ ການສະໜອງ ແລະແລກປ່ຽນຂໍ້ມູນຂ່າວສານກ່ຽວກັບ ນະໂຍບາຍດຶງດູດການລົງທຶນ, ທ່າແຮງການລົງທຶນ, ສະພາບ ການພັດທະນາບັນດາພື້ນຖານໂຄ່ງລ່າງ ທາງດ້ານເສດຖະກິດ ລວມທັງ ເຂດເສດຖະກິດພິເສດ ເພື່ອສ້າງເງື່ອນໄຂໃຫ້ມີການເພີ່ມທະວີການຄ້າ ແລະການລົງທຶນລະຫວ່າງ 2 ປະເທດ ລາວ-ຈີນ.
ກອງປະຊຸມໃນຄັ້ງນີ້ ທັງສອງຝ່າຍ ໄດ້ມີການແລກປ່ຽນຄຳເຫັນ ກ່ຽວກັບ ສະພາບພົ້ນເດັ່ນ ຂອງການພັດທະນາເສດຖະກິດ ແລະ ກາລະໂອກາດຂອງການລົງທຶນ ເພື່ອຮັດແໜ້ນການຮ່ວມມືລະຫວ່າງພາກລັດ ແລະ ພາກເອກະຊົນ ແລະ ເພີ່ມທະວີຄວາມຮັບຮູ້ກ່ຽວກັບຄວາມສາມາດບົ່ມຊ້ອນດ້ານການລົງທຶນຂອງ ລາວ-ຈີນ ໃນທຸກຂົງເຂດ ແລະ ໄດ້ເປິດເວທີໃຫ້ມີການນໍາສະເໜີໃນຫົວຂໍ້ຕ່າງໆຂອງພາກທຸລະກິດ ຂອງສອງປະເທດ ເພື່ອຍົກໃຫ້ເຫັນ ກາລະໂອກາດ ແລະ ທ່າແຮງ ຂອງການລົງທຶນຢູ່ໃນ ສປປ ລາວ ໃນ ຂະແໜງການສຳຄັນຕ່າງໆ ເປັນຕົ້ນ ການພັດທະນາພະລັງງານທົດແທນ, ການປຸງແຕ່ງແຮ່ທາດ, ໂລຈິດສະຕິກ, ການຄ້າອີເລັກໂທນິກ, ການທ່ອງທ່ຽວ, ການລົງທຶນທີ່ເປັນມິດຕໍ່ສິ່ງແວດລ້ອມ ລວມເຖິງການພັດທະນາຢູ່ໃນເຂດເສດຖະກິດພິເສດ ແລະ ອື່ນໆ. ພ້ອມກັນນັ້ນ, ໃນໂອກາດກອງປະຊຸມຄັ້ງນີ້ ໄດ້ມີພິທີລົງນາມເອກະສານຮ່ວມມືລະຫວ່າງພາກທຸລະກິດຈຳນວນ 3 ສະບັບ ເພື່ອເພີ່ມທະວີການຮ່ວມມືລະຫວ່າງນັກທຸລະກິດລາວ ແລະ ຈີນ.
ທ່ານນາຍົກລັດຖະມົນຕີ ແຫ່ງ ສປປ ລາວ ພ້ອມດ້ວຍຄະນະ ຍັງໄດ້ຕ້ອນຮັບການເຂົ້າຢ້ຽມຂໍ່ານັບຂອງ ອຳນາດການປົກຄອງແຂວງເຈິ້ຈຽງ ແລະ ທັດສະນະສືກສາ ກ່ຽວກັບວຽກງານການຫຼຸດຜ່ອນຄວາມທຸກຍາກ, ການພັດທະນານິຄົມອຸດສາຫະກໍາ ຈຳນວນໜຶ່ງ.
ສປ ຈີນ ແມ່ນຄູ່ຄ້າອັນດັບໜຶ່ງ ແລະ ເປັນປະເທດຜູ້ລົງທຶນທີ່ມີມູນຄ່າສູງທີ່ສຸດໃນ ສປປ ລາວ. ວິສາຫະກິດ ແລະ ນັກລົງທຶນຈາກ ສປ ຈີນ ໄດ້ມາລົງທຶນ ຢູ່ ສປປ ລາວ ໃນທຸກຂະແໜງການ ໂດຍສະເພາະ ຂະແໜງພະລັງງານ, ບໍ່ແຮ່, ພື້ນຖານໂຄງລ່າງ, ການບໍລິການ ແລະ ກະສິກໍາ, ແລະ ອື່ນໆ ເຊິ່ງລວມມີຫຼາຍກ່ວາ 900 ໂຄງການ ມີມູນຄ່າຫຼາຍກ່ວາ 15 ຕື້ ໂດລາສະຫະລັດ.
