ເວັບໄຊທາງການ
ກະຊວງແຜນການ ແລະ ການລົງທຶນ
ກົມສົ່ງເສີມການລົງທຶນ
ລົງທຶນໃສ່ອານາຄົດ, ລົງທຶນໃສ່ລາວ

        English      |      ລາວ


ກອງປະຊຸມປຶກສາຫາລືກ່ຽວກັບຮ່າງດຳລັດວ່າດ້ວຍການລົງທຶນຮ່ວມລະຫວ່າງພາກລັດ ແລະ ພາກເອກະຊົນ (PPP)

ໃນຄັ້ງວັນທີ 11/6/2015, ກົມສົ່ງເສີມການລົງທຶນ, ກະຊວງແຜນການ ແລະ ການລົງທຶນ, ໃນນາມເປັນຜູ້ຈັດຕັ້ງປະຕິບັດໜ້າວຽກຂອງອົງປະກອບທີ 3 (Component 3) ຂອງ ໂຄງການສ້າງຄວາມອາດສາມາດໃນການຄຸ້ມຄອງ ແລະ ບໍລິຫານພາກລັດ (Governance and Capacity Development in Public Sector Management Program) ທີ່ເປັນໂຄງການຊ່ວຍເຫຼືອລ້າ ຂອງທະນາຄານພັດທະນາອາຊີ, ໄດ້ຈັດກອງປະຊຸມ ປຶກສາຫາລື ເພື່ອທາບທາມຮ່າງດຳລັດວ່າດ້ວຍການລົງທຶນຮ່ວມລະຫວ່າງພາກລັດ ແລະ ພາກເອກະຊົນ (PPP) ຂຶ້ນ ເປັນເວລາ 1 ວັນ ທີ່ ໂຮງແຮມເມີກຽວ, ພາຍໃຕ້ການເປັນປະທານ ຂອງ ທ່ານ ມະໂນທອງ ວົງໄຊ, ຫົວໜ້າກົມສົ່ງເສີມການລົງທຶນ ໂດຍມີຜູ້ຕາງໜ້າຈາກ ຂະແໜງການທີ່ກ່ຽວຂ້ອງ ທັງພາກລັດ ແລະ ເອກະຊົນ ເຂົ້າຮ່ວມປຶກສາຫາລື ແລະ ປະກອບຄຳຄິດເຫັນຕໍ່ຮ່າງດຳລັດ ສະບັບດັ່ງກ່່າວ ຢ່າງກົງໄປກົງມາ. ຜ່ານການຄົ້ນຄວ້າຂອງ ກະຊວງ ຜທ ໂດຍຮ່ວມມືກັບຊ່ຽວຊານກົດໝາຍຈາກພາຍໃນ ແລະ ຕ່າງປະເທດ, ກະຊວງ ຜທ ໄດ້ ມີການຈັດກອງປະຊຸມປຶກສາຫາລືທາບທາມຮ່າງດຳລັດດັ່ງກ່າວມາແລ້ວຫຼາຍຄັ້ງ ແລະ ຄັ້ງນີ້ ກໍແມ່ນການທາບທາມ ຮ່າງທີ VIທີ່ໜ່ວຍງານຄົ້ນຄວ້າໄດ້ມີການປັບປຸງຕາມການສັງລວມຄຳເຫັນຈາກຂະແໜງການທີ່ກ່ຽວຂ້ອງ ທີ່ໜ່ວຍງານຄົ້ນຄວ້າໄດ້ຮັບຜ່ານມາ.

ຈຸດປະສົງຕົ້ນຕໍຂອງການສ້າງດຳລັດນີ້ ກໍເພື່ອ ນຳໃຊ້ເຂົ້າໃນການສົ່ງເສີມ ແລະ ຄຸ້ມຄອງ ການລົງທຶນຮ່ວມ ລະຫວ່າງລັດ ແລະ ເອກະຊົນ, ເພີ່ມຄວາມຫຼາກຫຼາຍໃນຮູບແບບການລົງທຶນ ແລະ ຊ່ວຍເຂົ້າໃນການພັດທະນາເສດຖະກິດ-ສັງຄົມ ຢ່າງມີປະສິດທິຜົນ ພ້ອມທັງຊ່ວຍໃຫ້ການນຳໃຊ້ງົບປະມານຂອງລັດຖະບານໃຫ້ມີປະສິດທິພາບ ແລະ ມີຄວາມຍືນຍົງ.  ນອກຈາກການຄົ້ນຄວ້າດ້ານກອບນະໂຍບາຍ ແລະ ນິຕິກຳ ທີ່ກ່ຽວຂ້ອງກັບ  PPP ແລ້ວກໍຍັງມີ ການສ້າງຄວາມເຂັ້ມແຂງໃຫ້ແກ່ໜ່ວຍງານ PPP ຂອງພາກລັດ ແລະ ການສ້າງໂຄງການຕົວແບບ (Pilot Project)ໃນຂະແໜງ ສາທາລະນະສຸກ ແລະ ຂະແໜງສຶກສາທິການ ແລະ ກິລາ. ຊຶ່ງຂະແໜງສຶກສາ ໄດ້ເລືອກເອົາ ໂຄງການກໍ່ສ້າງຫໍພັກນັກສຶກສາຊັບພະວິຊາຊັ້ນກາງ ຢູ່ໂສກປ່າຫຼວງ ເພື່ອເຮັດບົດສຶກສາຄວາມເປັນໄປໄດ້. ສ່ວນຂະແໜງສາທາ ແມ່ນຍັງຢູ່ໃນການຄົ້ນຄວ້າພິຈາລະນາ.

 

ກອງປະຊຸມຄັ້ງນີ້ ຖືວ່າມີຄວາມໝາຍ ແລະ ຄວາມສຳຄັນ ເນື່ອງຈາກວ່າ ແມ່ນກອງປະຊຸມທາບທາມແບບເປີດກວ້າງຄັ້ງສຸດທ້າຍ ເພື່ອຮວບຮວມເອົາ ບັນດາຄຳຄິດເຫັນໃນທີ່ປະຊຸມມາປັບປຸງຮຽບຮຽງໃຫ້ສົມບູນ ແລ້ວຈະນຳສົ່ງ ໃຫ້ກະຊວງຍຸຕິທຳ ເພື່ອຂໍຄຳເຫັນດ້ານນິຕິກຳ ເພື່ອການກ້າວໄປສູ່ການຮັບຮອງຈາກລັດຖະບານໃນຂັ້ນຕໍ່ໄປ.

 

 

Submit to FacebookSubmit to Google Plus
231535
ປັບປຸງລ່າສຸດ: 10 November 2016.